Татарстан Республикасының Дәүләт симфоник оркестры

Сәнгать җитәкчесе һәм баш дирижеры, Россиянең халык артисты Александр Сладковский.

Татарстанның симфоник оркестрын булдыру фикерен беренче булып, Татарстанның Композиторлар берлеге рәисе, Казан дәүләт консерваториясенең ректоры Нәҗип Җиһанов әйтә. Җиһанов һәм КПСС өлкә комитетының беренче секретаре Табеев башлангычы белән Казанга Натан Рахлин чакырып китерелә. 1979 елда Натан Григорьевичның вафатыннан соң, оркестр белән Ренат Салаватов, Сергей Калагин, Равил Мартынов, Имант Коциньш эшли. 1985 елда сәнгать җитәкчесе һәм баш дирижер вазифасына Россиянең һәм Казах ССРның халык артисты Фуат Мансуров чакырыла, ул оркестрда 25 ел эшли. 2010 елда Фуат Шакир улы вафат булганнан соң, яңа сәнгать җитәкчесе һәм баш дирижер итеп, Россиянең атказанган артисты Александр Сладковский билгеләнә (2016 елдан Россиянең халык артисты), Татарстанның Дәүләт симфоник оркестры 45 нче сезонын аның белән ача.

 

Аның килүе белән оркестрның тарихында яңа чор башлана. ТР Дәүләт симфоник оркестры тарафыннан оештырылган музыка фестивальләре – “Рахлин сезоннары”, “Ак сирень, “Казан көзе”, Concordia, “Денис Мацуев дуслары янында”, “Иҗади ачыш”, “Мирас” Татарстанның һәм Россиянең мәдәни тормышында олы вакыйгалар булып таныла. Оркестр музыка мәктәпләрендә һәм консерваториядә укучы талантлы балалар һәм студентлар өчен “Республика казанышы” проектын, Казанның мәктәп укучылары өчен “Оркестр белән музыка дәресләре” һәм “Оркестрның тылсымлы кыллары” дигән уку-укыту проектлары, инвалидлар һәм авыр хәлдәге балалар өчен “Музыка белән дәвалау” хәйрия проектларын булдырды.

Бүген Татарстан Республикасының Дәүләт симфоник оркестры Россиянең иң яхшы коллективлары исәбенә керә. ТР Дәүләт симфоник оркестры катнашкан концертлар Сrescendo, “Байкалда йолдызлар”, “Денис Мауевның Оренбург сезоннары”, “Чия урманы”, “Хибла Герзмава чакыра”, “Опера Априори” фестивальләре кысаларында, Клинда П.И. Чайковский исемендәге Халыкара сәнгать фестивале, Ла-Рок-д’Антерон Халыкара фортепиано музыкасы фестивале (Франция), Франциядә һәм Япониядә  La folle journée һ.б. фестивальләр кысаларында Мәскәү, Пермь, Оренбург, Иркутск, Сочи, Төмән шәһәрләрендә уңышлы чыгышлар ясый. 2016 елда үзенең тарихында беренче тапкыр Европа туры кысаларында Брукнерхауста (Линц) һәм Мюзикферайнның Алтын залында (Вена) концертлар бирде. 2018 елның декабрендә ТР Дәүләт симфоник оркестрының Кытайга беренче гастрольләре узды. 2019 елда Франциянең Нант шәһәрендә ARTE телеканалы La folle journée фестивалендә коллективның концертын яздырып трансляцияләде.

Александр Сладковский җитәкчелегендәге ТР Дәүләт симфоник оркестры - Россиядән Medici.tv һәм Mezzo телеканалларында яздырылган беренче төбәк коллективы. 2012 елда оркестр Sony Music һәм RCA Red Seal лейблларында ике альбом яздырды, ә 2016 елда “Мелодия” тавыш яздыру компаниясе белән берлектә берничә музыкаль проект гамәлгә ашырыла: Г.Малерның өч симфониясе (№№ 1, 5, 9), шулай ук Д. Шостаковичның барлык симфонияләре һәм уен кораллары концертлары яздырыла П.И. Чайковскийның барлык симфонияләре һәм уен кораллары концертларының язмасы 2020 елның язында Sony Classical лейблында чыгачак.

Сәнгать җитәкчесе һәм баш дирижер Александр Сладковский җитәкчелегендәге ТР Дәүләт симфоник оркестры хәзерге вакытта Мәскәү дәүләт филармониясендә үзенең еллык абонементы булган беренче һәм бердәнбер төбәк оркестры.